Rom 15 | NdeIBE | STEP | Thina esilamandla sifanele ukubekezelela ukwehluleka kwababuthakatha, hatshi ukuba sizithokozise.

Romans 15

1 Thina esilamandla sifanele ukubekezelela ukwehluleka kwababuthakatha, hatshi ukuba sizithokozise. 2 Lowo lalowo wethu kumele athokozise umakhelwana wakhe ngokuhle kuye, ukuze amakhe. 3 Ngoba loKhristu kazithokozisanga, kodwa njengoba kulotshiwe ukuthi: “Ukuthula kwalabo abalithukayo kwehlele phezu kwami.” 4 Ngoba konke okwalotshwa kudala kwalotshelwa ukusifundisa, ukuze kuthi ngokubekezela langokukhuthazwa yimibhalo sibe lethemba.

5 Sengathi uNkulunkulu onika ukubekezela lenkuthazo angalipha umoya wokumanyana phakathi kwenu lapho lilandela uKhristu Jesu,

6 ukuze kuthi nganhliziyo yonke langomlomo munye lidumise uNkulunkulu loYise weNkosi yethu uJesu Khristu.

7 Ngakho yamukelani, omunye lomunye, njengalokhu uKhristu walamukela, ukuze kudunyiswe uNkulunkulu. 8 Ngoba ngiyalazisa ukuthi uKhristu waba yinceku yamaJuda emele iqiniso likaNkulunkulu, ukuba aqinise izithembiso ezenziwa kubokhokho, 9 ukuze abezizwe badumise uNkulunkulu ngenxa yomusa wakhe, njengoba kulotshiwe ukuthi: “Ngenxa yalesisizatho ngizakudumisa phakathi kwabezizwe, ngizahlabela amahubo ebizweni lakho.”

10 Njalo, kuthi, “Thokozani, bezizwe, labantu bakhe.”

11 Njalo, kuthi, “Dumisani iNkosi, lonke lina bezizwe. Lihlabelele indumiso kuyo, lonke lina bantu.”

12 Njalo, u-Isaya uthi, “Impande kaJese izavela, lowo ozavuka ukuba abuse izizwe; abezizwe bazathembela kuye.”

13 Sengathi uNkulunkulu wethemba angaligcwalisa ngentokozo enkulu langokuthula ekumethembeni kwenu, ukuze libe lethemba elikhaphakayo ngamandla kaMoya oNgcwele.

UPhawuli Isikhonzi Kwabezizweni

14 Mina ngokwami ngiyakholwa, bazalwane bami, ukuthi lina ngokwenu ligcwele ukulunga, lilokwazi okupheleleyo njalo liyanelisa ukufundisana. 15 Ngililobele ngesibindi mayelana leminye imicijo, njengokungathi ngilikhumbuza yona futhi, ngenxa yomusa uNkulunkulu angiphe wona 16 ukuba yisikhonzi sikaKhristu uJesu kwabezizwe ngilomlandu wobuphristi wokutshumayela ivangeli likaNkulunkulu ukuze abezizwe babe ngumnikelo owamukelekayo kuNkulunkulu, ongcweliswe nguMoya oNgcwele.

17 Ngakho ngiyaziqhenya kuKhristu uJesu emsebenzini wami kuNkulunkulu. 18 Kangiyikuba lesibindi sokukhuluma ngolunye ulutho ngaphandle kwalokho uKhristu asekufeze ngami ekukhokheleni abezizwe ukuba balalele uNkulunkulu ngalokhu engakutshoyo lengakwenzayo – 19 ngamandla ezibonakaliso lezimangaliso, ngamandla kaMoya. Ngakho indlela yonke kusukela eJerusalema kusiya e-Ilirikhumu, sengilitshumayele ngokugcweleyo ivangeli likaKhristu. 20 Bekuhlezi kuyisifiso sami ukutshumayela ivangeli lapho uKhristu ayengaziwa khona, ukuze ngingakhi phezu kwesisekelo somunye. 21 Ikanti kulotshiwe ukuthi: “Labo abangatshelwanga ngaye bazabona, lalabo abangakezwa bazaqedisisa.”

22 Yikho nje kade ngixakeka ekubeni ngize kini.

Icebo LikaPhawuli Lokwethekela ERoma

23 Kodwa khathesi njengoba kungaselandawo engingasebenza kuyo kulezizigaba, njalo njengoba ngibe ngifisa okweminyaka eminengi ukulibona, 24 ngiceba ukwenza njalo lapho sengisiya eSipeyini. Ngithemba ukulibona ngisedlula lokuba lingisize ngohambo lwami lokuya khonale, emva kokuba sengithokoze ukuba lani okwesikhatshana. 25 Kodwa khathesi ngisendleleni yokuya eJerusalema emsebenzini wabangcwele khonale.

26 Ngoba abeMakhedoniya labe-Akhayiya kwabathokozisa ukubanika usizo abayanga phakathi kwabangcwele eJerusalema.

27 Kwabathokozisa ukwenza lokho, njalo impela balomlandu walokho kubo. Ngoba uma abezizwe bahlanganyela ezibusisweni zakomoya zamaJuda, balomlandu kumaJuda wokuhlanganyela lawo ezibusisweni zokwenyama. 28 Ngakho emva kokuqeda umsebenzi lo njalo sengibe leqiniso ukuthi sebesamukele isithelo lesi, ngizakuya eSipeyini njalo ngilethekelele ohambeni lwami.

29 Ngiyakwazi ukuthi lapho ngisiza kini, ngizakuza ngilesibusiso esigcweleyo sikaKhristu.

30 Ngiyalincenga bazalwane, ngeNkosi yethu uJesu Khristu langothando lukaMoya, ukuba lihlanganyele lami ekutshikatshikeni kwami ngokungikhulekela kuNkulunkulu.

31 Khulekelani ukuba ngihlengwe kwabangakholwayo eJudiya lokuthi umsebenzi wami eJerusalema wamukeleke kwabangcwele khonale.

32 Ngakho ukuze kuthi ngentando kaNkulunkulu ngizakuza kini ngentokozo njalo ngivuselelwe ngikanye lani. 33 UNkulunkulu wokuthula kabe lani lonke. Ameni.